Wanamoyo Mtakatifu wa Yesu, Jimbo Kuu Katoliki la Dar es Salaam na Jimbo Katoliki la Moshi, wakisali mbele ya sanduku lililobeba mwili wa Mwanashirika mwenzao, marehemu Theresia Nicholaus Massawe wakati wa Adhimisho la Misa Takatifu ya kumwombea, iliyoadhimishwa kijiji cha Maua Kati wilayani Moshi mkoani Kilimanjaro. (Picha na Yohana Kasosi)
Dar es Salaam
Na Mwandishi wetu
Wanajumuiya wametakiwa kulishika na kuliishi Neno la Mungu kwa ukamilifu bila kuwa na hofu yoyote katika maisha yao ya kila siku.
Wito huo ulitolewa hivi karibuni na Padri Bonaventure Kisoka, Paroko Msaidizi wa Parokia ya Kristo Mfalme – Tabata, Jimbo Kuu Katoliki la Dar es Salaam, wakati wa Adhimisho la Misa Takatifu ya Sikukuu ya Somo wa Jumuiya ya Mtakatifu Fabiano, parokiani hapo.
“Waamini muwe watu wa kusali kila mnapokutana, kwa sababu ninyi ni Wakrito, mnapoishi kwa umoja msije mkatengana, endeleeni kusali pamoja kama hivi leo mnaposherehekea Sikukuu yenu mmeungana kitu kimoja, hivi ndivyo inavyotakiwa Wakristo,”alisema Padri Kisoka na kuongeza,
“Tambueni kwamba Jumuiya ni kanisa ndogo la nyumbani, mnakuwa Wakrito wenye umoja. Endeleeni kusali pamoja kama hivi kila wakati, mfuateni Mtakatifu wenu wajumuiya, Mtakatifu wenu alikuwa mtu mwema ambaye alimsikiliza sana Mungu, na ninyi muwe watu wema.”
Aidha, aliwasihi kuungana kwa pamoja ili waweze kuwa na furaha katika Jumuiya yao, Kanda, pamoja na Parokia yao ya Kristo Mfalme, kwa ujumla.
Padri huyo aliwasihi Waamini wenye tabia za kujilimbikizia uongozi, waache kufanya hivyo, akisema kwamba baadhi yao wakipata uongozi, wanajiona ndiyo wameshafanikiwa.
Kwa upande wake Mwenyekiti wa Jumuiya hiyo ya Mtakatifu Fabiano, Alfred Kunambi alisema kuwa kwa sasa Jumuiya yao ni changa ina miezi michache tangu Paroko wa Parokia hiyo awatangaze, bali wanaishi Ukristo wao kwa furaha.
Kunambi aliongeza kuwa mwaka huu mpya, Jumuiya yao imejipanga vyema, hasa katika mavuno ya Parokia na Jimbo, pamoja na kushiriki katika michango mbalimbali wanayoambiwa na Parokia yao.
Hata hivyo, aliwaomba Viongozi wa Vyama vya Kitume kila Parokia na Parokia Teule, kumuunga mkono Askofu Mkuu wa Jimbo hilo, Mhashamu Sana Jude Thaddaeus Ruwa’ichi kwa kutoa michango yao ili kukamilisha ujenzi wa Kanisa Kuu Mbadala la Gezaulole.
MOSHI
Na Mwandishi wetu
Watanzania wametakiwa kutoruhusu Vyama vya Siasa viwagawe na kuwafanya watengane kwa itikadi hizo, kwani sifa kubwa ya Taifa hilo, ni kuwa na amani.
Hayo yalisemwa na Paroko Msaidizi wa Parokia ya Bikira Maria Mshindaji, Jimbo Katoliki la Kigoma, Padri George Muhanuka wakati wa Adhimisho la Misa Takatifu ya kumuombea marehemu Theresia Nicholaus Massawe, iliyofanyika Parokia ya Bikira Maria Mpalizwa Mbinguni – Kibosho- Singa, Jimbo Katoliki la Moshi.
Aidha, Padri huyo aliwasihi Waamini kuwa wamoja, huku wakiachana na tabia ya ubinafsi katika imani yao.
“Waamini, tujitahidi kuwa wamoja, tuachane na tabia ya ubinafsi katika imani. Lakini pia Vyama vya Siasa CCM, CHADEMA, au chama chochote kile, visitugawe katika umoja wetu tukiwa Watazania wenye amani,” alisema Padri Muhanuka.
Padri Muhanuka aliongeza kwa kusema, “Ndugu zangu Waamini tujiandae, hatujui muda wala saa tutakapoitwa na Mungu, maana tunakuwa Waamini wa Jumapili tu, wala hatupo kama Waamini wa kuwa na Mungu karibu.”
Padri huyo alisema pia kuwa Theresia Massawe enzi ya uhai wake, aliuishi Ukristo wake kwa imani moja ya Kanisa Katoliki, ambaye pia alikuwa mwanashirika la Moyo Mtakatifu wa Yesu, na alijiunga pia na Shirika la Mtakatifu Anna.
“Je, wewe Mwamini umejiunga na chama gani cha Shirika la Kanisa? Jitathmini Ukristo wako unaoishi kwa sasa, Mungu ametuleta hapa duniani ili tumtambue na tumtumikie, ili siku ikifika, tuwe mahali pa wokovu. Huyu mama aliishi kiukamilifu bila shaka lolote,” alisema Padri huyo.
Alibainisha pia kuwa Waamini wengi hawauishi Ukristo wao kikamilifu, kwa sababu ya kutangatanga katika Makanisa mbalimbali kutafuta miujiza.
DAR ES SALAAM
Na Jonas Abel
Mamlaka ya Mapato Tanzania (Tanzania Revenue Authority: TRA), imesema kuwa mfumo mpya wa Tanzania Customs Integrated System (TANCIS), utarahisisha uingizwaji wa bidhaa kutoka nje ya nchi na kuingia ndani kwa haraka, jambo litakalosaidia kukuza uchumi wa mtu mmoja mmoja na watafanyakazi mchana na usiku.
Mfumo huo uliozinduliwa hivi karibuni, umebuniwa ili kuboresha ufanisi, kuhakikisha usahihi, na kupunguza ucheleweshaji katika shughuli za forodha.
Akizungumza wakati wa Maadhimisho ya Siku ya Kimataifa ya Forodha, Januari 26 mwaka huu, yenye kaulimbiu “Forodha itatimiza ahadi yake ya usalama na ustawi”.
Kamishna Mkuu wa TRA, Yusuph Mwenda alieleza maboresho makubwa yaliyofanywa kwenye mfumo huo alisema,
“Mfumo mpya wa TANCIS unatumia teknolojia ya akili bandia kwa ajili ya uchakataji wa data kwa usahihi, uwazi zaidi, na urahisi wa operesheni…TRA tumejipanga kuboresha mifumo yetu na taratibu kwa kutumia teknolojia ya kisasa ili kuboresha shughuli za forodha.”
Alisema kwamba mfumo ulioboreshwa, ambao ulianza kufanya kazi rasmi Januari 20, 2025, umekumbana na changamoto ndogo wakati wa uzinduzi wake wa awali. Hata hivyo, Kamishna Mkuu (Commissioner General) aliwahakikishia wadau kuwa mafundi wanashughulikia changamoto hizo kwa bidii.
Alisisitiza pia kuwa mfumo mpya utapunguza kwa kiasi kikubwa ucheleweshaji wa ukaguzi wa mizigo na gharama zisizo za lazima, hivyo kuboresha ufanisi kwa ujumla.
“Ahadi yangu, pamoja na timu yangu, ni kuwa kuanzia Februari, mfumo huu ulioboreshwa utaanza kufanya kazi kikamilifu na kuwafaidisha watumiaji wote,” alisema, akibainisha kuwa maboresho hayo pia yatahakikisha thamani ya bidhaa inakokotolewa kwa haki na usahihi zaidi.
Kwa upande wake, Rais wa Chama cha Mawakala wa Forodha Tanzania (TAFFA), Edward Urio, alionyesha matumaini kuhusu mfumo mpya wa TANCIS, akipongeza uwezo wake wa kuboresha ufanisi na uwazi katika ukusanyaji wa mapato.
“Tunaamini mfumo huu utaongeza uwazi na ufanisi,” amesema Urio. Hata hivyo, amekiri kuwa baadhi ya wanachama wamekumbana na changamoto, kama vile gharama za ziada kutokana na ucheleweshaji wa kuhifadhi na kusafirisha mizigo wakati wa awamu ya awali ya utekelezaji wa mfumo huo.
Kwa upande mwingine, Kamishna wa Forodha, Juma Bakari alisema kuwa mfumo mpya wa ukaguzi wa bidhaa umeboreshwa zaidi ukilinganisha na ule wa awali uliotumika tangu mwaka 2014.
“Unarahisisha shughuli za kibiashara, hasa katika uagizaji na usafirishaji wa bidhaa,” alisema Bakari.
Alibainisha pia kuwa mfumo huo unaziunganisha taasisi 36 zinazoweza kuutumia, hivyo kuboresha mawasiliano kati yao.
Aidha, alisema kwamba kutakuwa na matumizi bora ya taarifa, kwani data zitasimamiwa vizuri, hivyo kusaidia maafisa wa forodha na taasisi nyingine kufanya maamuzi sahihi.
Mfumo mpya wa TANCIS ni hatua muhimu katika kuboresha taratibu za forodha nchini Tanzania, kuhakikisha taifa linaendelea kufanikisha malengo yake ya usalama na ustawi.
DAR ES SALAAM
Na Mwandishi wetu
Wakili wa Kujitegemea Dk. Aloys Rugazia amesema eneo la jinai la kubambikiwa kesi ni eneo linalosumbua watu wengi katika jamii.
Amesema kuwa Wananchi wamekuwa wakilalamika kwamba hiyo ni changamoto wanayokutana nayo katika maisha yao.
Dk Rugazia (pichani) alisema hayo katika viwanja vya Shule ya Sekondari Kibasila jijini Dar es Salaam wakati wa maandalizi ya kutoa elimu ya sheria bure na kuandaa nyaraka katika kuadhimisha wiki ya sheria kwa lengo la kuwafikia wananchi ambao hawana fedha za kupata huduma za sheria.
“Tunapokutana na wananchi wanatueleza changamoto nyingi katika eneo la jinai kwamba kuna kubambikiwa kesi kuna kuonewa ndiyo maana tunawataka waje hapa tuwape elimu ya kutosha wajue haki zao ni zipi na watakiwa kufanya nini,” alisema Dk. Rugazia
Aidha, alisema changamoto nyingine ambayo wananchi wanapata ni eneo la ardhi na mirathi wajane, wazee na watoto yatima wanapata shida kupata haki zao za msingi kwa wakati.
“Ardhi ni maisha ni moja kati ya mali muhimu katika mustakabali wa watu mara nyingi ardhi imekuwa ikileta msuguano waliyonacho na wasio nacho, mara nyingi wanajikuta katika hali ngumu ndiyo maana kwa wiki hii tunatoa msaada bure watu waje,” alisema Dk. Rugazia.
Aliongeza kwamba wapo kwenye wiki ya sheria ambayo ilizinduliwa Januari 25, 2025 kwa kawaida wanaadhimisha kwa kujaribu kuifikia jamii kuhakikisha inapata haki kwa sababu sio kila mtu anauwezo wa kulipia gharama za kupata huduma za kisheria.
Rais wa Jamhuri ya Muungano Dk. Samia Suluhu Hassan hivi karibuni alianzisha mpango maalumu wa kusaidia wananchi wa Mama Samia Legal Aid, mkakati wa kutoa msaada wa kisheria kwa watu wanaishi kwenye jamii wenye kiu ya kudai haki ambao hawawezi kuipata.
Kisarawe
Na Mwandishi Wetu
Waziri wa Viwanda Dk. Selemani Jaffo ameiagiza Mamlaka ya Maji Vijijini (Ruwasa) kuchimba Kisima kirefu Kata ya Bwama iliyopo Wilayani Kisarawe, Mkoani Pwani.
Dk. Jaffo ambaye pia ni Mbunge wa Jimbo la Kisarawe alitoa agizo hilo alipofika Bwama kwenye kuzindua Zahanati ya Bwama iliyogharimu Shilingi milioni 77/- hadi kukamilika kwake tangu ujenzi ulipoanza mwaka 2010.
DAR ES SALAAM
Na Salehe Said
Naibu Katibu Mkuu wa Umoja wa Mataifa (United Nations: UN), Amina Mohamed ameipongeza Serikali ya Tanzania kwa mkakati wa kufanya utafiti wa kina wa kijiolojia na utafutaji madini nchini.
Amina alitoa pongezi hizo hivi karibuni wakati wa mkutano wa pembeni wa Mkutano wa Nishati, alipokutana na Waziri wa Madini, Anthony Mavunde.
DAR ES SALAAM
Na Mathayo Kijazi
Waandishi wa Habari wametakiwa kutumia vyema kalamu zao kuandika habari zenye ukweli, na si zenye kuwachafua wengine, kwani wana jukumu la kueneza ujumbe wa matumaini, upendo na amani.
Hayo yalisemwa na Mkurugenzi wa Mawasiliano Jimbo Kuu Katoliki la Dar es Salaam, Padri Joseph Massenge, katika homilia yake wakati wa Adhimisho la Misa Takatifu ya Jubilei ya Miaka 2025 ya Ukristo kwa Wanamawasiliano wa Jimbo hilo, iliyoadhimishwa katika Parokia ya Bikira Maria, Mama wa Fatima, Msimbazi.
“Wanahabari tumieni vyema kalamu zenu kuandika habari zenye ukweli, epukeni kuandika habari zenye kuwachafua wengine. Mnatakiwa kueneza ujumbe wa matumaini, upendo na amani,” alisema Padri Massenge.
Padri Massenge ambaye pia ni Mkurugenzi wa Tumaini Media, na Paroko wa Parokia ya Bikira Maria wa Rozari Takatifu - Makongo Juu, alitoa wito huo kwa wanahabari kuhakikisha Injili inafika kwa kila kiumbe.
Ageukia utunzaji mazingira:
Aliwasihi kupitia kazi zao wanahabari hao wahamasishe pia kuhusu utunzaji wa mazingira, kwani kwa kutunza mazingira, watakuwa wamepeleka Injili kwa kila kiumbe.
“Hakikisheni Injili inafika kwa kila kiumbe, siyo kwa kila binadamu tu, ni kwa kila kiumbe. Kupitia kazi zenu hizo, nendeni mkahamasishe pia kuhusu utunzaji wa mazingira…Tunzeni mazingira ili yawatunze, mkifanya hivyo mtakuwa mmetangaza habari njema kwa kila kiumbe,” alisema Padri Massenge.
Aidha, aliwasisitizia wanahabari hao kuepuka kuwa waandishi wenye kuandika habari zenye maslahi ya papo kwa papo, bali wafanye kazi zao wakizingatia maadili ya uandishi wa habari.
Padri Massenge aliwasihi wanamawasiliano hao kuwaombea waandishi wote waliotangulia mbele za haki kutokana na kazi zao, akiwataka kuendelea kusimamia ukweli katika uwajibikaji wao.
Padri Mujuni awafunda Waandishi:
Kwa upande wake, Padri Audiphace Mujuni, Padri wa Jimbo Katoliki la Bunda, anayechukua masomo yake katika fani ya Uandishi wa Habari katika Chuo Kikuu cha Mtakatifu Agostino (SAUT), Tawi la Msimbazi, jijini Dar es Salaam, alisema kwamba vyombo vya habari vina haja ya kuchangia kuleta upendo na mshikamano katika jamii.
Aidha, Padri Mujuni aliongeza kuwa waandishi wa habari ni vyombo vya matumaini katika ulimwengu, hivyo ni wajibu wao kufanya kazi kwa kufuata misingi inayowaongoza.
“Waandishi wa habari, tambueni kwamba ninyi ni vyombo vya matumaini katika ulimwengu. Kwa hiyo, ni wajibu wenu kufanya kazi kwa kufuata misingi na taratibu zinazowaongoza. Mnapaswa kuwa watumishi wa kweli, mkifahamu kwamba kila neno linaweza kuleta athari katika jamii,” alisema Padri Mujuni.
Aliwasisitiza wanamawasiliano kufanya kazi zao, huku wakimtanguliza Mungu, wakitambua kwamba uandishi wao usiwe sababu ya kuikosa mbingu.
DAR ES SALAAM
Na Laura Chrispin
Askofu Msaidizi wa Jimbo Kuu Katoliki la Dar es Salaam, Mhashamu Stephano Musomba, amewasihi Watawa kutambua kwamba wito ni zawadi ya thamani kutoka kwa Mungu, hivyo wasifanye mzaha.
Alisema hayo hivi karibuni wakati wa Adhimisho la Misa Takatifu ya Kupandishwa hadhi ya Utawa kwa Wapostulanti kuwa Wanovisi, iliyofanyika katika Kituo cha Kiroho -Mbagala, jimboni humo.
“Wito ni zawadi ambayo usipoitambua, utaipoteza, na baadaye utajutia, kwani utakuwa umepoteza tunu ya thamani zaidi kwa sababu ya kufuata mikumbo katika jumuiya, kwa kusikiliza maneno ya wengine na kusahau ulichoitiwa na Mungu, kwa sababu ya tamaa ya ulimwengu na uwongo wa watu wa nje,” alisema Askofu Musomba.
Aidha, alisema kuwa kuongoka ni kutoka katika fikra zisizo njema, na kuanza kufikiria mambo yanayofaa na kumpendeza Mungu, kwani hata Mtume Paulo aliyekuwa akiitwa Sauli, alikuwa ni mtu aliyewachukia Wakristo, na aliwatesa.
Na hata wakati mwingine alidiriki kuyabomoa makanisa, na hata alipokuwa njiani akielekea Damaskasi nchini Syria kuwatafuta Wakristo, ajabu alisikia sauti ikimwita ‘Sauli Sauli, mbona unanitesa’ na yeye hakutambua ni nani, na sauti imetokea wapi.
Aliendelea kusema kuwa ile sauti ilimjibu na kumwambia, Mimi ni Yesu; na baada ya kuingia Damaskasi, alibatizwa na kupewa maelekezo ya kulijenga Kanisa na kubadilishwa jina na kuitwa Paulo, badala ya Sauli.
Askofu Musomba aliwasihi Watawa wote kupenda kujitoa zaidi kwa kuwatumikia wengine kwa unyenyekevu mkubwa, bila kujibakiza wala kujali chochote au kusema wanaonewa na wengine au kuteswa, badala yake wanatakiwa kutambua wapo kwa ajili ya kutumwa, kwani waiitwa na wakaitika.
Askofu Musomba alisema umoja na upendo unaweza kuharibika kwa sababu ya udanganyifu na hisia, na kuwasihi kuwakemea Watawa wengine ambao watakuwa wanaenda tofauti na mapenzi ya Mungu, na kuwataka watambue wakifanya hivyo itawafanya waishi vizuri zaidi.
Aliendelea kusema kuwa Mungu hapendi kuona jumuiya yenye magomvi na masimango, wala kuona jumuiya ya watu wenye roho mbaya, badala yake wanatakiwa kutengeneza jumuiya yenye upendo na upatanisho.
Askofu Musomba aliwapongeza Wapostulanti watano kwa kuvuka hatua na kuwa Wanovisi, na kuwataka wawe ni watu wenye unyenyekevu na furaha kama ya wakati ule walipoandika barua ya kuomba kujiunga katika shirika, na kusikia wamekubaliwa ombi lao.
Askofu Musomba alisema kwamba ukiona mwenzako anafanya vibaya, alafu unampongeza na kufurahia ujue hiyo ni tabia mbaya, na kuwaasa wasidanganyike katika safari yao ya Utume bali wazidi kumwomba Mungu ili wazidi kukua kiimani.
DAR ES SALAAM
Na Rosemary Daniel
Imeelezwa kuwa Wakristo wengi wamekuwa na tabia ya kumiliki Bibilia nyingi kama fasheni, pasipo na faida yoyote katika maisha yao hasa kwa kuisoma, kuielewa na kupata ujumbe wa Mungu.
Hayo yalielezwa na Dekano wa Dekania ya Ubungo, Jimbo Kuu Katoliki la Dar es Salaam, Padri Gallen Mvungi wakati akitoa homilia yake katika Adhimisho la Misa Takatifu aliyoadhimisha katika Parokia ya Maria Mtakatifu, Kimara.
Padre Mvungi ambaye pia ni Paroko wa Parokia ya Utatu Mtakatifu, Changanyikeni, Jimbo Kuu Katoliki la Dar es Salaam, alisema,
“Kuwa na Bibilia nyingi bila kusoma, siyo tija kama hatujitaabishi na kijibidiisha kuisoma, kuelewa na kupata ujumbe wa Mungu. Unakuta Mkristo ana Bibilia nyumbani, kwenye gari, kwenye mkoba na hata ofisini kwake, ila imekaa kama pambo tu bila kusomwa.”
Padri Mvungi (pichani) alisema kuwa Wakristo wengi hawampatii Mungu nafasi ya kwanza katika maisha yao, bali wanamweka Mungu kama pambo la kuthibitisha kile wanachokifikiri.
“Pale tunaposoma na kuyaelewa Maandiko Matakatifu, huwa yanapenya ndani kabisa na kuichoma mioyo yetu na kuinua Imani yetu, ndipo tunapopokea majibu ya maombi yetu, njia zetu za kiimani zinafunguka na kuleta amani na uzima tele,”alisema Padri Mvungi.
Alisema kuwa Maadiko Matakatifu pia yanafundisha, kuonya, kurekebisha na kuasa wanadamu waliokengeuka kwa namna ya kipekee kulingana na karama na vipawa vyao, na jinsi walivyoguswa na maandiko hayo.
“Ndani ya Maandiko Matakatifu, jumbe tofauti ambazo zinamgusa Mkristo mmoja mmoja kulingana na kipawa na karama yake kwa jinsi Mungu alivyomjalia, kama vile kila kiungo kilivyo na kazi yake katika mwili wa binadamu,”aliongeza kusema Padri Mvungi.
Alisema kwamba endapo Wakristo hao watakapoyaelewa na kuyashika Maandiko Matakatifu ya Mungu,hakika hawawezi kudanganyika, na wala Ulimwengu hautawahadaa kwa kutafuta mambo ya kidunia, kukimbilia makanisa mengine kutafuta miujiza.
DAR ES SALAAM
Na Mathayo Kijazi
Waamini wa Parokia ya Mtakatifu Yohane Maria Muzeey – Tegeta ‘A’, Jimbo Kuu Katoliki la Dar es Salaam, wameadhimisha siku ya Somo wa Parokia hiyo, huku wakitakiwa kupendana katika kila hali walizo nazo, kwani hakuna aliyeumbwa kuwa mtumwa kwa wengine.
Hayo yalisemwa na Padri Prosper Kessy, Gombera wa Kituo cha Hija cha Mtakatifu Padri Pio, San Damiano – Msimbazi, Jimbo Kuu Katoliki la Dar es Salaam, wakati wa homilia yake katika Adhimisho la Misa Takatifu ya Somo wa Parokia ya Mtakatifu Yohane Maria Muzeey – Tegeta ‘A’, jimboni humo.
“Kwa hiyo ndugu, tupendane katika hali zozote tulizo nazo, kwa sababu hakuna aliyeumbwa kwa ajili ya kuwa mtumwa kwa watu wengine, yaani hata ukijiona una pesa kiasi kwamba ukaamua kutafuta wafanyakazi wa nyumbani kwako, lakini tambua kwamba wale hawakuumbwa kwa ajili ya kuja kuwa watumwa wako,” alisema Padri Kessy.
Aidha, Padri huyo aliwasihi Waamini kufahamu kwamba Neno la Mungu ni tofauti na maneno mengine, kwani Neno hilo huwabadilisha hata majambazi na kuamua kuishi maisha yanayofaa katika jamii.
Padri huyo aliwasisitiza Wakristu kuliruhusu Neno la Mungu lifanye kazi katika maisha yao ili liwabadilishe, na kuwa watu wema.
Alitoa wito kwa Waamini kuliruhusu Neno hilo lifanye kazi katika biashara zao, akiwataka kuepuka udanganyifu katika biashara hizo, ikiwemo kujipangia viwango vya bei za bidhaa, tofauti na bei halali za bidhaa hizo.
“Liruhusuni Neno la Mungu liingie katika biashara zenu, ili liwasaidie kuwa waaminifu. Wapo wafanyabiashara ambao ukifika wanakudanganya kwamba ‘nguo hii imetokea Uturuki,’ ili akuuzie kwa bei ya juu zaidi, huku ukiamini kwamba kwa sababu imetoka Uturuki, basi itakuwa ni nzuri na imara zaidi…
“Yaani mtu anaamua kuuza bidhaa kwa bei mara tatu zaidi ya aliyonunulia, huo ni udanganyifu wa juu sana katika biashara. Halafu baadaye anatoka mbele za watu anasema, ‘Mungu amenitendea mambo makuu sana katika biashara yangu,’ huyo aliyekutendea siyo Mungu, bali ni shetani kupitia udanganyifu wako,” alisema Padri Kessy.
Padri Kessy alitoa wito kwa wazazi kuwapa watoto wao malezi yaliyo bora, na si ya kuwanyenyekea, kwani wakiwadekeza kupitiliza, watawatengenezea mazingira magumu pale watakapokuwa wakubwa.
Aidha, aliwashukuru Waamini wa Tegeta ‘A’ kwa kumwalika kusali naye katika Adhimisho hilo la Misa Takatifu ya Somo wa Parokia, akiwaasa kuendelea kushikamana na kuwa wamoja ili waweze kupiga hatua kimaendeleo parokiani hapo.
Kwa upande wake Paroko wa Parokia hiyo, Padri Urbanus Riziki alimshukuru Padri Kessy kwa kukubali mwaliko wa kwenda kuungana na Waamini wa Tegeta ‘A’, akimshukuru pia kwa kuongoza Misa hiyo Takatifu.
Padri Riziki aliwaasa Waamini parokiani hapo kuongeza nguvu katika kuchangia ujenzi wa kanisa jipya linaloendelea kujengwa, ili waweze kuukamilisha kwa haraka ujenzi huo.
Kwa mujibu wa Katibu wa Parokia hiyo, Prisila Clemence, Parokia ya Mtakatifu Yohane Maria Muzeey - Tegeta ‘A’ ilianzishwa kama Kigango cha Mtakatifu Yohane Maria Muzeey, Julai 6 mwaka 2007.
Kigango hicho kilianzishwa kutoka Parokia ya Bikira Maria Mama wa Huruma - Mbezi Beach (BMMH) iliyokuwa chini ya Paroko wa Mbezi Beach wa wakati huo, Padri Romuald Mukandara.
Baadaye Kigango hicho kilihamishiwa Parokia ya Bikira Maria Consolatha – Makabe, chini ya Mapadri wa Missionaries of Mary Immaculate (MMI), baadaye tena kikahamishwa na kuwa chini ya Parokia ya Benedicta wa Msalaba – Msumi.
Julai 7 mwaka 2018, Mwadhama Polycarp Kardinali Pengo, Askofu Mkuu wa Jimbo Kuu Katoliki la Dar es Salaam kwa wakati huo, alikipandisha hadhi kuwa Parokia Teule.
Julai 7 mwaka 2020, Mtakatifu Yohane Maria Muzeey - Tegeta ‘A’ ilitangazwa rasmi kuwa Parokia Kamili na Askofu Mkuu wa Jimbo hilo, Mhashamu Sana Jude Thaddaeus Ruwa’ichi, na kuwekwa chini ya Mapadri wa Jimbo hilo, ambapo Padri Urbanus Riziki Ngowi alitangazwa kuwa Paroko wa Parokia hiyo.
DAR ES SALAAM
Na Mwandishi wetu
Baba Mtakatifu Fransisko ameridhia ombi la kung’atuka kutoka shughuli za kichungaji za Jimbo Katoliki la Iringa, lililowasilishwa na Askofu wa Jimbo hilo, Mhashamu Tarcisius Ngalalekumtwa, akimteua Padri Romanus Elamu Mihali kuwa Askofu mpya wa jimbo hilo.
Askofu Mteule Mihali ameteuliwa baada ya Askofu Ngalalekumtwa aliyekuwa akiongoza jimbo hilo, kufikisha umri wa kustaafu.
Kabla ya uteuzi huo, Askofu mteule Mihali alikuwa Makamu wa Askofu wa Jimbo Katoliki la Mafinga, na Paroko wa Parokia ya Ujewa, jimboni humo.
Askofu Mteule Mihali alizaliwa Juni 10, mwaka 1969 katika Kijiji cha Itulituli, Wilaya ya Mufindi, Mkoa wa Iringa.
Baada ya majiundo yake ya Falasafa na Taalimungu katika Seminari Kuu ya Songea, alipewa Daraja Takatifu la Upadri Julai 13 mwaka 2000 kwa ajili ya Jimbo la Iringa.
Askofu Mteule Mihali katika utume wake, alishika nyadhifa mbalimbali na kuendelea na masomo zaidi, ambapo mwaka 2000 hadi 2003, alikuwa Paroko Msaidizi wa Parokia ya Mtakatifu Paulo Mtume huko Ilula, jimboni Iringa.
Mwaka 2003 hadi mwaka 2005 alikuwa Mlezi na Mkufunzi wa Seminari Ndogo ya Mtakatifu Kizito, Jimbo Katoliki la Mafinga.
Aidha, mwaka 2005, hadi 2011, aliendelea na masomo yake ya Uzamili wa Sayansi katika Sayansi ya fani ya wanyama, na kupata Shahada yake katika Chuo Kikuu cha Kerala nchini India.
Mwaka 2012 hadi 2015 alifanya utume kama Paroko Msaidizi wa Parokia ya Bikira Maria wa Fatima huko Usomaki, jimboni Iringa.
Mwaka 2015 hadi 2024, alikuwa akifanya utume kama Paroko wa Parokia ya Bikira Maria Mpalizwa, Ujewa, Iringa.
Baada ya kuundwa kwa Jimbo Katoliki la Mafinga mwaka 2024, na kupatikana Askofu mpya wa Jimbo hilo, Padri Romanus aliteuliwa kuwa Makamu Askofu wa Jimbo hilo, na Paroko wa Parokia ya Bikira Maria Mpalizwa (Mafinga), hadi uteuzi wake.
Askofu Mstaafu Tarcisius Ngalalekumtwa ataendelea kuwa Msimamizi wa Kitume wa Jimbo Katoliki la Iringa hadi Askofu Mteule Mihali atakapowekwa wakfu wa Kiaskofu kwa ajili ya Jimbo hilo hilo.
DAR ES SALAAM
Na Celina Matuja
Madaktari na Wauguzi Wakatoliki nchini wametakiwa kuzingatia mambo muhimu ili waweze kutoa huduma kadri ya mwelekeo wa Bwana Yesu Kristo.
Madaktari na wauguzi hao wameaswa pia kutumia muda wao kusali ili kuomba mwongozo wa Mungu katika huduma zao kwa wagonjwa.
Askofu Msaidizi wa Jimbo Kuu Katopliki la Dar es Salaam, Mhashamu Henry Mchamungu ametoa maagizo hayo katika salamu kwenye Semina ya Madaktari na Wauguzi Wakatoliki, iliyoandaliwa na Jimbo hilo, iliyofanyika katika Parokia ya Kristo Mfalme, Tabata.
Semina hiyo ilikwenda sanjari na Adhimisho la Misa Takatifu, ambapo katika homilia yake aliwataka madaktari hao, kufuata mfano wa Mtakatifu Paulo aliyewaua na kuwatesa Wakristo, lakini aliongoka, hivyo wao nao wahakikishe wanaleta uponyaji kwa wagonjwa na kuihubiri Injili.
“Kutokana na Ufunuo wa Kristo mwenyewe, Mtakatrifu Paulo alifanya kazi kubwa na nyingi kufundisha habari njema za Yesu Kristo, baada ya kuongoka. Sisi pia tuongoke kama Paulo, hivyo nawapatia ‘take home’ ili mpate kuzingatia katika kazi yenu,” alisema Askofu Mchamungu.
Askofu awapa Madaktari ‘vitendea kazi’:
Moja ya mambo ambayo walitakiwa kuzingatia wanataaluma hao ni kusali na kuomba maongozi ya Mungu, kwa sababu kazi yao inagusa moja kwa moja uumbaji na uhai.
Kuwahi kazini na kuwajibika kwa wagonjwa kwa moyo wa upendo na furaha, kuwasikiliza wagonjwa kwa umakini ili kuelewa shida zao kiafya ili kutoa matibabu sahihi.
Kuepuka uzembe kazini na kuwa makini, kwa kufanya kazi kwa kujiamini ili kumpa mgonjwa tumaini la kupona ama kupata ahueni, kupenda kazi na kuitenda kwa furaha kwa kuwa ni wito wao.
Kutoa huduma bila kudai chochote kwa mgonjwa, na kutumia lugha nzuri, ikiwemo kutunza siri za mgonjwa.
Kutokuwa na mahusiano ya kimapenzi na wagonjwa wao, kuwahudumia kwa karibu wagonjwa wanaohitaji uangalizi makini, kama wanaoongezewa damu, maji mwilini, na hasa nyakati za usiku.
Aidha, Askofu Mchamungu aliwataka kusoma na kujiendeleza zaidi ili kuwa na ujuzi mkubwa kwa kusoma vitabu mbalimbili vinavyohusu taaluma yao.
Padri Mosha: Fanyeni kazi bila kinyongo:
Kwa upande wake, Padri Dakta Joseph Mosha, Paroko wa Parokia ya Chuo Kikuu cha Dar es Salaam (UDSM), alikemea baadhi ya tabia za Wauguzi na Madaktari kutotoa huduma kwa moyo na ari kwa wagonjwa.
Aliwataka kutambua kwamba wao ni washirikishwa wa kazi ya utendaji wa Mwanadamu kutoka kwa Mungu, na kutokuondoa nafasi ya Mungu katika maisha ya Mwanadamu.
Padri Mosha alisema kuwa Maandiko, kitabu cha mwanzo 1:26 akinaeleza kwamba “Sisi Binadamu tumeumbwa kwa sura na mfano wa Mungu,”, akiwataka Wanataaluma hao kutambua kwamba kila wanapomwona mgonjwa, watambue kuwa ni sura na mfano wa Mungu.
Alisema kwamba maisha huanza kwenye familia, hivyo hawana budi kutenda kwa misingi ya Mwenyezi Mungu pasipo kufuata ile siasa ya uhuru wa kufanya lolote, ambao una upotofu.
Padri Kessy: Tendeni kazi kwa upendo:
Naye Padri Prosper Kessy Gombera wa Kituo cha Hija cha San Damiano Msimbazi, aliwakumbusha Madaktari na Wauguzi hao, kutenda kazi zao kuzingatia huruma na upendo.
Aidha, aliongeza kuwa itamsaidia sana mgonjwa iwapo atapokea huruma na upendo, bila kusahau kumhudumia kwa hadhi njema, na hisia ya utu.
Kwamba kuna baadhi ya watu wamepoteza hisia, wanaona kila jambo ni sawa, wamezoea kifo, hata wakimwona mgonjwa yu mahututi wanaona kama ni mfu, wasikubali iwatawale, kwani Mungu amempa kila mtu hisia na huruma.
Jambo lingine la kuzingatia ni kuigeuza kazi kuwa sala,kwa maana ya kusali kabla ya kuwahudumia wagonjwa na kuifanya kazi hiyo kwa umakini, ndipo inapogeuka kuwa injili na sala.
Aliwataka pia kuvumilia kutokana na matukano mbali mbali, ila kusimama na msimamo wa kuutafuta utakatifu na uaminifu kwa kuheshimu uhai mwanzo mpaka mwisho, kwa kukemea maovu mamlaka waliyopewa wasikubali kushiriki katika dhambi.
Akinukuu Maandiko Matakatifu Matayo 28:16 – 20: Nimepewa mamlaka yote Duniani na Mbinguni enendeni mkawafanye mataifa yote kuwa wanafunzi mkiwabatiza kwa jina la Baba na la Mwana na la Roho Mtakatifu.
VATICAN CITY, Vatican
Baba Mtakatifu Fransisko amekutana na Maaskofu, Marais wa Tume za Mawasiliano za Mabaraza ya Maaskofu na Wakurugenzi wa Ofisi za Mawasiliano za Mabaraza ya Maaskofu.
Katika hotuba yake Baba Mtakatifu aliwashukuru kwa kushiriki nao, akiwakaribisha wote ambao katika Makanisa mahalia wanafanya huduma ya kuwajibika katika nyanja ya mawasiliano.
“Inapendeza kuwaona hapa, Maaskofu, Mapadri, Watawa wa kike na kiume na walei, walioitwa kuwasilisha maisha ya Kanisa na mtazamo wa Kikristo wa ulimwengu. Kuwasiliana na maono haya ya Kikristo ni kuzuri,” alisema Papa Fransisko.
Aidha, Papa aliongeza kwa kusema, “Tunakutana leo, baada ya kuadhimisha Jubilei ya Ulimwengu wa Mawasiliano, kufanya mapitio na pia uchunguzi wa dhamiri pamoja. Hebu tutulie ili kutafakari zaidi juu ya njia halisi tunayowasiliana nayo, inayohuishwa na imani ambayo, kama ilivyoandikwa katika Waraka kwa Waebrania, ni kuwa na hakika ya mambo yatarajiwayo na bayana ya mambo yasiyoonekana…
Baba Mtakatifu Fransisko alifafanua kuwa hiyo ambayo kwao ni huduma ya kitaasisi, pia ni wito wa kila Mkristo, wa kila mtu aliyebatizwa, na kwamba kila Mkristo anaitwa kuona na kusimulia historia za mema ambayo uandishi wa habari mbaya hujaribu kufuta, na kutoa nafasi ya uovu tu.
Alibainisha pia kwamba uovu upo, hivyo haupaswi kufichwa, lakini lazima ukoroge, uzae maswali na majibu, na kusema kwamba kwa sababu hiyo, kazi yao ni kubwa na inawahitaji wajitoe wenyewe kufanya kazi ya pamoja ili ya kuwashirikisha kila mtu, kuwathamini wazee, vijana, wanawake na wanaume kwa kila lugha, kwa maneno, sanaa, muziki, uchoraji, na picha.
Aliwataka Waamini kufahamu kwamba wote wameitwa ili kuthibitisha jinsi gani wanawasiliana naye, hivyo wanahitaji kuwasiliana kwa kila linalotokea.
Alisisitiza kuwa changamoto ni kubwa, huku akihimiza kuimarisha harambee kati yao, katika ngazi ya bara na ya ulimwengu mzima ili kujenga mtindo tofauti wa mawasiliano, tofauti katika roho, katika ubunifu, katika nguvu ya kishairi inayotoka katika Injili na isiyokwisha.
Aidha, Baba Mtakatifu alikiri jambo moja kwao kuwa anajali zaidi akili ya asili kuliko akili mnemba, akisema kuwa akili ya asili ndiyo ambayo wanapaswa tuikuze, na kwamba wanapohisi kuwa wameanguka kwenye shimo, watazame zaidi ndani yao wenyewe.
Radio –Television Tumaini, also trading as Tumaini Media, consisting of Radio Tumaini, a weekly newspaper “Tumaini Letu” and a Television Station “Tumaini Television” is owned and run by the Archdiocese of Dar es Salaam, Tanzania since 1994.
+(255) 238-4131
info@tumainimedia.co.tz/p>
